Մյուռոնի զորությունը /Վիդեո/

Սահակ Սրբազան Մաշալյան

Շարունակել կարդալ

ԱՎԵՏԱՐԱՆԻ ՈՒՍՈՒՑՈՒՄ -ԲԱՐԻ ՍԱՄԱՐԱՑԻ /Վիդեո/

ԱՎԵՏԱՐԱՆԻ ՈՒՍՈՒՑՈՒՄ -ԲԱՐԻ ՍԱՄԱՐԱՑԻ - Սահակ Սրբազան Մաշալյան

Շարունակել կարդալ

ԱՂՈԹՔ ԲԺՇԿՈՒԹՅԱՆ ՀԱՄԱՐ

Փարատեա զցաւս եւ բժշկեա զհիւանդութիւնս ի ժողովրդենէ քումմէ, Տէր Աստուած մեր, եւ շնորհեա ամենեցուն զկատարեալ առողջութիւն, նշանաւ ամենայաղթ խաչիւ քով, որով բարձեր զտկարութիւն ազգի մարդկան եւ դատապարտեցեր զթշնամին կենաց եւ փրկութեան մերոյ: Դ

ու ես կեանք մեր եւ փրկութիւն, բարերար եւ բազումողորմ Աստուած, որ միայն կարող ես թողուլ զմեղս եւ մերժել զախտս եւ զհիւանդութիւնս ի մէնջ, որում յայտնի են պէտք կարեաց մերոց: Պարգեւիչդ բարեաց, պարգեւեա զառատ ողորմութիւնս քո ի վերայ արարածոց քոց՝ ըստ իւրաքանչիւր պիտոյից. յորոց հանապազ փառաւորեալ գովի Ամենասուրբ Երրորդութիւնդ. այժմ եւ միշտ եւ յաւիտեանս յաւիտենից: Ամէն:

Տեր Աստուած մեր, փարատիր ցաւերն ու բժշկիր հիւանդութիւնները քո ժողովրդից եւ շնորհիր բոլորին կատարեալ առողջութիւն՝ քո ամենայաղթ խաչիդ նշանով, որով մարդկութեան տկարութիւնը կրեցիր և դատապարտեցիր մեր կեանքի եւ փրկութեան թշնամուն: Դու ես մեր կեանքն ու փրկութիւնը, բարերար եւ բազումողորմ Աստուած: Միայն Դու կարող ես ներել մեր մեղքերը եւ մեզանից հեռացնել ախտերն ու հիւանդութիւնները, որին յայտնի են մեր կարիքները: Բարիքներ պարգեւող, առատ ողորմութիւնդ պարգեւիր քո արարածներին՝ իւրաքանչիւրին ըստ իր կարիքի: Եւ նրանց միջոցով միշտ թող գովաբանուի Ամենասուրբ Երրորդութիւնդ. այժմ, միշտ եւ յաւիտեանս յաւիտենից: Ամէն:

Շարունակել կարդալ

Հովիվն ու իր աղոթքը (առակ)

Մի հովիվ երեք ոչխար ուներ: Երբ արոտավայրում էր, քնով ընկավ, պառկեց խոտերի վրա ու քնեց: Արթնանալիս տեսավ, որ կորցրել է իր ոչխարներից երկուսին և սկսեց աղոթել Աստծուն, որ գտնի իր ոչխարներին, բայց այդպես էլ իր աղոթքը մնաց անպատասխան. փնտրեց ու չգտավ իր ոչխարներին: Վերադարձավ այնտեղ, ուր քնել էր: Հովիվը սկսեց գանգատվել Աստծուց, որ իրեն չի օգնում և այդ պահին աչքը ընկավ գետնի վրայի հետքերին, որոնք գայլերի հետքեր էին: Քայլեց այդ հետքերով և փոքր-ինչ հեռու տեսավ երեք գայլ, որոնք ննջում էին, իսկ նրանց մոտ իր ոչխարների ոսկորներն էին ընկած: Հովիվը սկսեց փառք տալ Աստծուն, որ կենդանի է մնացել ու զգուշությամբ հեռացավ այդ վայրից: 

Հաճախ Աստված չի իրագործում մեր աղոթքների խնդրանքները` մեզ փրկելով սատանայի թակարդներից, որը գայլերի պես հանկարծակի հարձակվում է, որպեսզի մեզ կործանի: 

Երբեմն Աստված մեզ համար կարևոր թվացող երևույթներ զոհում է հանուն մեր փրկության համար:
Հեղինակ` Հովհաննես սարկավագ Մանուկյան

Աղբյուրը՝ http://ter-hambardzum.com/news/2013-02-06-1421

Շարունակել կարդալ

Հպարտության մոլորությունը (Առակ)

«Տերը հակառակ է ամբարտավաններին, նա շնորհ է տալիս խոնարհներին» (Առակ. 4:34): 

Յուրաքանչյուր մարդ կարող է հարց տալ, թե` «Ի՞նչ է ամբարտավան և կամ ո՞վ է նա»: Հայերելն լեզվի բառագրքում «ամբարտավան» բառի դիմաց գրված է հետևյալ բացատրությունը. «Մի մարդ, որը հպարտ ու գոռոզ է»: Այս բառին իբրև հոմանիշ դրված են` «ինքնահավան» և «մեծամիտ» բառերը: 

Այսօր 21-րդ դարում հոգեկան հիվանդագին մի վիճակ է տիրում մեր շուրջը: Մարդիկ ուղղակի տառապում են «մեծության» և «ինքնահավանության» մոլուցքից: 

Այս պատմությունը ճիշտ սրա մասին է. 

«Հին Հունաստանում ապրող մի ոմն իմաստուն ոսպ (աղքատի կերակուր) էր ուտում ծառի տակ: Նրան է մոտենում մի մեծահարուստ և հպարտ մի պալատական հռետոր ու ծաղրանքով խրատում. – Ո`վ իմաստուն մարդ, եթե դու քո խելացիությանդ հետ մի քիչ էլ շողոքորթություն ու հպարտություն ունենայիր և կարողանայիր կեղծավորություն անել, այժմ պալատում փառահեղ ճաշ կուտեիր: 
Իմաստունը անվրդով պատասխանում է. 
- Իսկ դու, ո~վ ստախոս, եթե ոսպով բավարարվերիր, կարիք չէիր ունենա կեղծավորություն անելու և ստորանալու մեծերի առջև»: 

Համեստ և խոնարհ մարդուն երջանիկ ապրելու համար բավական է աշխարհի մի խաղաղ անկյունը սիրելի անձերով շրջապատված, մի պատառ հացը ու հոգու խաղաղությունը: 

Ամեն մարդ պետք է լավ ճանաչի իր անձը, որպեսզի իմանա իր բարի հատկությունները, վստահի իրեն և հաջողություն ունենա կյանքում, սակայն որևէ մեկը իրավունք չունի իրեն վերագրելու այնպիսի արժանիքներ, որոնք չունի և ոչ էլ իրավունք ունի վիրավորելու ուրիշներին, որքան էլ նրանցից բարձր լինի իր հարստությամբ, մտքով, հեղինակությամբ ու գեղեցկությամբ: 
Խոնարհությունը անզորության և վախկոտության նշան չի, (ինչպես սխալմամբ կարծում են որոշ մարդիկ), ու ոչ էլ մարմնավոր և կամ մտային հիվանդություն: Նա օրհնություն, առաքինություն և շնորհք է: 

Կ. Պոլսի Պատրիարք Պողոս Ադրիանուպոլսեցին իր «Խրատի Թանգարան» Գրքի «Հպարտություն» բաժնում ասում է. 

«ԻԳ. Ամեն հպարտ կա’մ տգետ է, կամ հանդուգն: Տգետ է, որովհետև չունեցած բարին կարծում է, թե ունի, քանզի հպարտներին հատուկ է մտքով կուրանալ, և հանդուգն է, որովհետև ունեցած սակավ բարիքներով կամենում է ընկերների մեջ առավել բարձր երևալ, որով և արհամարհում է ուրիշներինէ իբրև բարիքներից զուրկ եղողներին»: 

Հեռո’ւ մնացեք յոթը մահացու մեղքերից մեկից`ՀՊԱՐՏՈՒԹՅՈՒՆԻՑ: Ամեն:

Տ. Հովսեփ Ա.Քահանա Հակոբյան

Աղբյուրը՝ http://ter-hambardzum.com/news/2013-03-06-1451

Շարունակել կարդալ

Եթե դուք միասին լինեք, ոչ ոք չի կարողանա կոտրել ձեզ (Առակ)

Մի ծերունի երեք որդի ուներ: Եվ նրանք ոչ մի կերպ չէին կարողանում միասին համերաշխ ապրել: Ծերունին շատ էր ուզում, որ իր մահվանից հետո որդիները խաղաղ ապրեն: Նա որոշեց դաս տալ նրանց: 
Մի անգամ նա նրանց կանչեց իր մոտ և խնդրեց ավելը մեջտեղից երկու կես անել: Սկզբից փորձեց ավագ որոդին, բայց որքան էլ ջանաց՝ ոչինչ չստացվեց: Միջնեկ և կրտսեր որդիների մոտ էլ ոչինչ չստացվեց: Այդ ժամանակ հայրը քանդեց ավելի կապերը, ծղոտների փնջերն առանձնացրեց իրարից, և որդիներին խնդրեց մի քանի ծղոտ կոտրել: Ինչ խոսք, որդիները հեշտությամբ կարողացան կոտրել: 
Այդ ժամանակ հայրն ասաց. 
- Կյանքում էլ ճիշտ այդպես է: Եթե դուք միասին լինեք, ոչ ոք չի կարողանա կոտրել ձեզ, իսկ առանձին լինելիս ձեզ հաղթելը նույնքան հեշտ է, որքան երկու ծղոտ կոտրելը:

Գրառում՝ Սմբատ սարկավագ Խանվելյան

Աղբյուրը՝ http://ter-hambardzum.com/news/2013-03-16-1463 

Շարունակել կարդալ

Օձը և թագավորը (առակ)

Կար մի թագավոր և ուներ նա մի սիրելի օձ, որ նրան ամեն օր բերում էր մի կարմիր դահեկան: Եվ թագավորն ունեցավ մի մանուկ, որին սնուցում էր գահի վրա և օձը նետում էր մանկան պարանոցով, և այդպես խաղում էին օձն ու մանուկը: Եվ երբ մանուկը մեծացավ, մի անգամ խաղի ժամանակ սուրը հանեց և կտրեց օձի պոչը և գետին գցեց: Եվ զայրացավ օձը, թույնով զարկեց մանուկին, և մանուկը իսկույն մեռավ, և օձը գնաց օտար երկիր: Եվ երբ թագավորը եկավ և մանուկին օձի թույնից սևացած և մեռած տեսավ և օձի պոչը գետնին ընկած, իմացավ, որ յուր մանուկն է թրով կտրել օձի պոչը: Եվ սգաց որդուն, տարավ թաղեց գերեզմանում: 
Եվ անցավ մի առ ժամանակ, և թագավորը խնդրանքներ ուղարկեց այն օձի մոտ և ասաց. «Գիտեմ, որ առաջ իմ որդին է ծռություն արել. նա կտրել է քո պոչը, ապա դու կծել ես նրան: Ինչ որ եղավ՝ եղավ, և իզուր գնացիր: Արի և մենք կլինենք առաջվա մնան իրար սիրելի և միասին կապրենք»: Իսկ օձը պատասխան տվեց և ասաց. «Այդպես չէ: Քանի որ ես պիտի նայեմ իմ պոչի վրա, իսկ դու քո որդու գերեզմանին, ուրեմն մեր միջից թշնամությունը չի վերանա: Լավն այն է, որ դու և ես իրարից հեռանանք, որպեսզի այլ ուրիշ մեծագույն չարիք չծնվի մեր մեջ»:

Գրառում՝ Սմբատ սարկավագ Խանվելյանի

Աղբյուրը՝ http://ter-hambardzum.com/news/2013-03-25-1472

Շարունակել կարդալ

ՀԻՆԱՎՈՒՐՑ ՀԻՎԱՆԴՈՒԹՅՈՒՆ (առակ)

Դևերի համաժողովին (մոտ 1500 տարի առաջ) սատանայի գլխավորությամբ որոշում են, թե որ դևին արժանացնեն «Տարվա հայտնություն» տիտղոսին: Առաջին դևը վեր է կենում ու ասում, թե ինքը մարդկանց հավատացրել է, որ դժոխք գոյություն չունի և որ բոլորս գնալու ենք միանգամից դրախտ. հավատացինք, թե չէ, գնում ենք դրախտ, կեր խմի, քեֆ արա, սպանիր, գողացիր, մեկ է դրախտ ենք գնալու: Բոլորը ծափահարում են, բացականչություններ, սակայն սատանան ասում է, որ այնքան էլ զորավոր գործ չէր, քանի որ դեռ շատ մարդիկ կան, ովքեր միևնույն է հավատում են, որ դժոխք կա: 
Վեր է կենում երկրորդ դևն ու ասում, թե ինքն էլ մարդկանց հավատացրել է, որ Աստված չկա, նորից հիացական բացականչություններ ժողովականների կողմից, սակայն սատանան այս մեկին էլ չի հավանում: 
Վերջում դահլիճի մի անկյունից վեր է կենում ամենափոքր, կաղ, մի աչքով, խղճուկ մի դևիկ ու ասում, թե ինքը մարդկանց մեջ դրել է Սուրբ Գիրք կարդալու ցանկություն: 
Ժողովականները կատաղում են, հարձակվում այս դևիկի վրա, ու քիչ է մնում, թե խեղդեն, սակայն այս խղճուկն ասում է. 
-Համբերե°ք, ախր դուք մինչև վերջ չլսեցիք: Ես մարդկանց սրտերում Սուրբ Գիրք կարդալու ցանկություն դրեցի, սակայն ՈՉ ՀԻՄԱ: Ես այնպես արեցի, որ բոլոր մարդիկ, ու հատկապես քրիստոնյաները, մեծ ցանկություն ունենան Սուրբ Գիրք կարդալու, սակայն միևնույն ժամանակ այնպես արեցի, որ նրանք բոլորն էլ, ու հատկապես քրիստոնյաները, տառապեն ՈՉ ՀԻՄԱ հիվանդությամբ: 
«Տարվա հայտնություն» տիտղոսին արժանացավ թշվառ դևիկը: 
Արդյոք մենք էլ չե՞նք տառապում այս թշվառ դևիկի հարուցած հիվանդությամբ:

Գրառում՝ Գևորգ դպիր Մանուկյան

Աղբյուրը՝ http://ter-hambardzum.com/news/2013-03-27-1474

Շարունակել կարդալ

ՀՂԻ ԿՆՈՋ ԱՂՈԹՔՆ ԱՍՏՎԱԾԱԾՆԻՆ

Ո՜վ Աստծո փառավորյալ Մայր, օգնության հասիր ինձ իմ բոլոր տկարությունների ու վտանգների պահին, որոնց մեջ մանուկ են ծնում Եվայի բոլոր դուստրերը։ Ո՜վ Օրհնյալդ կանանց մեջ, հիշիր, թե ինչպիսի ուրախությամբ ու սիրով էիր այցելության շտապում քո ազգական Եղիսաբեթին` իր հղիության ժամանակ, և ինչ սքանչելի եղավ քո այցը մոր և մանկան համար։ Քո անսպառ բարեսիրությամբ նաև ինձ` նվաստ աղախնուս էլ պարգևիր բարեհաջող որդեծնության շնորհը, որպեսզի այժմ սրտիս տակ հանգիստ գտած բալիկս, զգայություն առնելով, մանուկ Հովհաննեսի նման ուրախությամբ ու խայտալով ցնծա Փրկիչ Աստծով, Ով մեղավորներիս հանդեպ անսահման սիրուց մղված` չխորշեց մեզ պես մարդանալուց եւ Մանուկ լինելուց։ Այն անանց ուրախությունը, որով լցվեց կուսական սիրտդ` նորածին Քո Մանկանն ու Տիրոջը հայելիս, թող սփոփի նաև ինձ և թեթևացնի ծննդաբերությանս ծանրությունը։ Իմ Փրկիչն ու Կյանքն աշխարհի, որ մարմին առավ և ծնվեց քեզանից, թող պահպանի ինձ հոգու և մարմնի բոլոր վտանգներից, իսկ դեռ լույս աշխարհ չեկած մանկանս դասի Աստծո ընտրյալների մեջ։ Լսի՛ր խոնարհ աղաչանքներս ո՜վ Երկնային Ամենասուրբ Թագուհի եւ շնորհընկալ հայացքդ ուղղիր ինձ ու հովանի եղիր, թող ամոթով չմնա քո մեծ բարեգթությանն ապավինած հույսս։ Տիրոջ անունը բոլոր կրողների օգնական, ապաքինող բոլոր հիվանդություններից ու տկարություններից, թող ես էլ համոզվեմ, որ Դու ես Մայրը գթության և միշտ փառավորեմ քեզանից ծնված Աստծո Որդուն և Աստծո Մայրությունդ, որ չի մերժում իրեն աղաչողներին և ազատում է վշտերի ու հիվանդությունների մեջ իրեն կանչողներին. Ամեն:

Շարունակել կարդալ

ԱՂՈԹՔ ԲԱՐԴ ՀՂԻՈՒԹՅԱՆ ԺԱՄԱՆԱԿ

ԱՂՕԹՔ ՎԱՍՆ ԴԺՈՒԱՐԱԾԻՆ ՅՂԻ ԿՆՈՋ

Տէր Աստուած մեր Յիսուս Քրիստոս, մեծ եւ բարձրեալ, անայլայլելի, անփոփոխելի եւ մշտնջենաւոր. որ իջեր ի յերկնից եւ մարմնացար ի սրբոյ Կուսէն Մարիամայ Հոգւովն Սըրբով, եւ զապականեալն մեղօք զբնութիւն մեր ի նախահօրն յանցանաց՝ որով ամենայն կանացի բնութիւն ընկալաւ զպատուհաս անիծից՝ ցաւօք եւ տրտմութեամբ ծնանիլ զզաւակ, սրբեցեր աստուածութեամբ քով: Եւ արդ աղաչեմք զքեզ, մարդասէր Թագաւոր, ստեղծող եւ նորոգող մեր եւ բժիշկ հիւանդութեանս մերոյ, բժշկեա՛ եւ առողջացո՛ (այս անուն) անուն զաղախին քո: Առաքեա՛ զօգնութիւն քո ի սրբութենէ քումմէ, եւ տո՛ւր սմա զօրութիւն ծնանիլ զզաւակ, որպէսզի զպտուղ որովայնի իւրոյ մաքրեալ յամենայն արատոյ, ծննդեամբ սուրբ Աւազանին՝ ընծայեսցէ Եկեղեցւոյ քում սրբոյ: Շնորհեա՛ ծննդականիս այսորիկ հանդարտութեամբ եւ առանց վնասու հասանիլ ի խնդութիւն, եւ ամենայն տանց հաւատացելոց աճել եւ բազմանալ ի փառս տէրութեան քո եւ ի լրումն աստուածային քո բանիդ, եթէ «Աճեցէք եւ բազմացարուք»: Այո՛, Տէր Աստուած մեր, լո՛ւր եւ այժմ խնդրուածոց անարժան ծառայիս եւ ամենեցուն որ շուրջ կան աստ, բարեխօսութեամբ անարատ ծնողի քո սուրբ Աստուածածնին եւ ամենայն սրբոց քոց: Զի քեզ՝ միածնի Որդւոյդ, եւ անսկիզբն եւ համագոյ Հօր քոյ, եւ կենդանարար եւ ամենասուրբ Հոգւոյդ՝ վայել է փառք, պատիւ եւ երկրպագութիւն, այժմ եւ միշտ եւ յաւիտեանս յաւիտենից. ամէն:

Ով մեր Տեր Աստված Հիսուս Քրիստոս՝ բարձրյալ և մեծ, անայլայլելի, անփոփոխելի  և մշտնջենավոր. դու, որ երկնքից իջար և Սուրբ Հոգու միջոցով սուրբ Կույս Մարիամից ծնվեցիր և քո Աստվածությամբ սրբեցիր նախահոր հանցանքի հետևանքը՝ մեղքով ապականված մեր բնությունը, որով կանացի բնությունը ցավերով և տրտմությաբ զավակ ծնելու անեծք ու պատիժ ստացավ:

Արդ աղաչում ենք քեզ, մարդասեր Թագավոր, դու, որ մեր ստեղծիչն ու նորոգողը և մեր հիվանդությունների բժիշկն ես, բժշկի՛ր քո (անունը) աղախնին: Քո սուրբ բնակությունից օգնի՛ր և զորացրո՛ւ նրան, որպեսզի իր զավակն ունենա և նրան՝ իբրև իր որովայնի պտուղ, Սուրբ Ավազանից ծնունդով ամեն արատներից մաքրելով՝ Քո սուրբ Եկեղեցուն ընծայի: 

Շնորհի՛ր, որ այս ծննդկանը հանդարտությամբ և առանց փորձանքի հասնի ուրախության, և բոլոր հավատացյալ տները աճեն ու բազմանան քո փառքի համար, ո՛վ Տեր, որպես կատարում աստվածային քո խոսքի. «Աճեցե՛ք և բազմացե՛ք»: Այո՛, Տեր մեր Աստված, այս պահին լսիր քո անարժան ծառայի և բոլոր այստեղ գտնվողների խնդրանքը, անարատ ծնողիդ՝ սուրբ Աստվածածնի և բոլոր սրբերիդ բարեխոսությամբ. որովհետև քեզ՝ Միածին Որդուդ, և անսկիզբ ու համագո քո Հոր և կենդանարար ու ամենասուրբ Հոգուդ են վայել փառքը, պատիվն ու երկրպագությունը այժմ և միշտ և հավիտյանս հավիտենից. ամեն:

Շարունակել կարդալ

ՍԱՂՄՈՍ ԱՊԱՇԽԱՐՈՒԹՅԱՆ՝ ՈՂՈՐՄՅԱ

ՍԱՂՄՈՍ Ծ

Ողորմեա՛ ինձ, Աստուա՛ծ, ըստ մեծի ողորմութեան քում, ըստ բազում գթութեան քում քաւեա՛ զանօրէնութիւնս իմ: Առաւել լուա՛ զիս յանօրէնութենէ իմմէ, եւ ի մեղաց իմոց սուրբ արա՛ զիս: Զանօրէնութիւնս իմ ես ինձէն գիտեմ, եւ մեղք իմ առաջի իմ են յամենայն ժամ: Քեզ միայն մեղայ, Տէ՛ր, եւ չար առաջի քո արարի: 
Որպէս արդար եղիցիս ի բանս քո, եւ յաղթող ի դատել քեզ: Անօրէնութեամբ յղացաւ, եւ ի մեղս ծնաւ զիս մայր իմ: Դու, Տէ՛ր, զճշմարտութիւն սիրեցեր, զանյայտս եւ զծածկեալս իմաստութեամբ քով յայտնեցեր ինձ: Ցօղեա՛ յիս մշտկաւ եւ սուրբ եղէց, լուա՛ եւ քան զձիւն սպիտակ եղէց: Լսելի արա՛ ինձ, Տէ՛ր, զցնծութիւն եւ զուրախութիւն, եւ ցնծասցեն ոսկերք իմ տառապեալք: Դարձո՛ զերեսս քո ի մեղաց իմոց, եւ զամենայն անօրէնութիւնս իմ քաւեա՛ յինէն: Սիրտ սուրբ հաստատեա յիս Աստուած, եւ հոգի ուղիղ նորոգեա՛ ի փորի իմում: 
Մի՛ ընկենուր զիս, Տէ՛ր, յերեսաց քոց եւ զհոգի քո սուրբ մի՛ հաներ յինէն: Տո՛ւր ինձ ցնծութիւն փրկութեան քոյ, եւ հոգւով պետութեան քոյ հաստատեա զիս: Ուսուցից անօրինաց զճանապարհս քո, եւ ամպարիշտք առ քեզ դարձցին: Փրկեա՛ զիս յարենէ, Աստուա՛ծ, Աստուած փրկութեան իմոյ. ցնծասցէ լեզու իմ յարդարութեան քում: Տէ՛ր, եթէ զշրթունս իմ բանաս, բերան իմ երգեսցէ զօրհնութիւնս քո: Թէ կամեցեալ էիր պատարագս մատուցանէաք, բայց դու ընդ ողջակէզս իսկ ո՛չ հաճեցար: 
Պատարագ Աստուծոյ՝ հոգի խոնարհ, զսիրտ սուրբ եւ զհոգի խոնարհ Աստուած ո՛չ արհամարհէ: 
Բարի արա, Տէ՛ր, կամօք քովք Սիոնի եւ շինեսցին պարիսպքն Երուսաղեմի: Յայնժամ հաճեսցիս ընդ պատարագս արդարութեան, յորժամ ուխտից պատարագս հանցեն ի սեղան քո զուարակս:

Ողորմի՛ր ինձ, Աստվա՛ծ, քո մեծ ողորմությամբ և քո գթառատությամբ ջնջի՛ր իմ հանցանքները։ Առավել ևս լվա՛ ինձ իմ անօրենությունից և իմ մեղքերից մաքրի՛ր ինձ։ Իմ անօրենություններն ես ինքս գիտեմ, և մեղքերն իմ միշտ առջևս են։  Քո դեմ միայն մեղանչեցի, Տե՛ր, և չարիք գործեցի քո առջև, որպեսզի արդար լինես քո խոսքերում, և հաղթող՝ քո դատաստանի մեջ։  Անօրենությամբ հղիացավ և մեղքերի մեջ ծնեց ինձ մայրն իմ։ Դու, Տե՛ր, ճշմարտությունը սիրեցիր և քո իմաստության անհայտն ու ծածուկն ինձ հայտնեցիր։  Ցողի՛ր ինձ սպունգով՝ և ես կմաքրվեմ, լվա՛՝ ու ձյունից ճերմակ կլինեմ։ Ինձ ցնծություն և ուրախություն լսել տո՛ւր, և թող տառապյալ ոսկորներս ցնծան։ Երեսդ շո՛ւռ տուր իմ մեղքերից և իմ բոլոր հանցանքները ջնջի՛ր ինձնից։ Իմ մեջ մաքուր սիրտ հաստատի՛ր, Աստվա՛ծ, և արդար հոգի նորոգի՛ր իմ որովայնում։ Մի՛ գցիր ինձ, Տե՛ր, քո երեսից և սուրբ Հոգիդ մի՛ հանիր ինձնից։ Ինձ փրկության ցնծությո՛ւն տուր, և քո տիրական Հոգով հաստատի՛ր ինձ։ Անօրեններին կսովորեցնեմ քո ճանապարհը, և ամբարիշտները քո կողմը կդառնան։ Փրկի՛ր ինձ արյունից, Աստվա՛ծ, իմ փրկությա՛ն Աստված. լեզուս թող ցնծա քո արդարությամբ։ Տե՛ր, եթե շրթներս բացես, բերանն իմ կերգի օրհնությունը քո։ Եթե ուզեիր՝ պատարագ կմատուցեինք, բայց դու ողջակեզներ չես սիրում։ Խոնարհ հոգին է պատարագն Աստծու, մաքուր սիրտն ու խոնարհ հոգին Աստված չի արհամարհում։ Քո բարեհաճությամբ բարի՛ք գործիր Սիոնին, Տե՛ր, և Երուսաղեմի պարիսպները թող կառուցվեն։ Այնժամ դու կհավանես արդարության պատարագները, և, իբրև ուխտի զոհեր, քո սեղանին հորթեր կմատուցեն։ 

Շարունակել կարդալ

Ամեն տեսակ խնդրանքների կատարման զորավոր աղոթք Սբ. Գրիգոր Նարեկացուց

Կենդանի Աստուծո Որդի, օրհնյալ` ամեն բանի մեջ, դու` ահավոր Հոր անքննելի ծնունդ, Քեզ համար անկարելի բան չկա:

Երբ քո փառավոր ներկայության
Անստվեր նշույլները ծագեն`
Մեղքերը կը հալվեն,
Դեւերը կը հալածվեն,
Հանցանքները կը ջնջվեն,
Կապանքները կը խզվեն,
Շղթաները կը փշրվեն,
Մահացածները նոր ծնունդով
Կը կենդանանան,
Հարվածները կը բժշկվեն,
Վերքերը կ՛առողջանան,
Ապականությունը կը վերանա,
Տխրությունը տեղի կտա,
Հեծությունը կը նահանջի,
Խավարը կը փախչի
Մշուշը կը մեկնի,
Մառախուղը կը հեռանա,
Մռայլը կը փարատվի,
Աղջամուղջը կը սպառվի, 
Մութը կը վերանա,
Գիշերը կը մեկնի,
Տագնապը կը տարագրվի,
Չարիքները կը չքանան,
Հուսահատությունը կը հալածվի
Եւ քո ամենակարող ձե՛ռքը
Կը թագավորի,
Ո՛վ քավիչ բոլորի:

Դու, որ չեկա՛ր մարդկանց հոգիները կորցնելու, այլ` փրկելու, քո անսահման ներողամտությամբ ների՛ր իմ անթիվ չարիքները, որովհետեւ միայն դո՛ւ ես երկնքի մեջ անճառելի եւ երկրի վրա անքննելի, որ ներկա ես գոյություն ունեցող յուրաքանչյուր տարրի մեջ եւ աշխարհի բոլոր կողմերում. դու ամեն բանի սկիզբը, ամեն բանի մեջ ներկա, որ կատարելապես օրհնաբանվում ես բարձունքներում. Հոր եւ Սուրբ Հոգու հետ միասին` փա՜ռք Քեզ` հավիտյան:

Ամեն:

Մատյան Ողբերգության, գլ. ԽԱ

Շարունակել կարդալ

Չարից պաշտպանվելու ընդհանրական աղոթք

Հզո՜ր թագավոր, Քրիստոս, մեր Աստված, ապավեն` քեզ ծարավ եղողներին եւ փրկիչ` նեղության մեջ եղողներին: Դու` որ անօրենների կողմից չարչարվեցիր մեզ համար, ցո՛ւյց տուր քո զորությունը եւ եկ փրկի՛ր ինձ, որ քո արյունով գներցիր: Թույլ մի՛ տուր, որ սատանան գերի ինձ, քո փրկածին, մի՛ թող, որ չարը իր բնակարանը դարձնի ինձ, քո սուրբ անունով կնքված տաճարս. մի՛ թող, որ թշնամին կոխկռտի ու ծաղրի ինձ, քո մարմնի մեկ անդամը, այլ քո արարչական սիրով գթա՛ ինձ, քո արարածին:

Տե՜ր, ողորմի՛ր մեզ, որ քո խաչը դարձրինք մեր միակ պարծանքը. թող քո խաչը պահի՛ մեզ տեսանելի եւ անտեսանելի թշնամուց:

Տե՜ր, ողորմի՛ր մեզ, որ քեզ` Աստծուդ ծնող ամենասուրբ կույսին ապավինեցինք. նրա աղոթքներով փրկի՛ր մեզ չարից, որպեսզի առանց փորձանքների կնքենք մեր պանդուխտ կյանքերը:

Քո տասներկու սուրբ առաքյալների եւ նրանց աշակերտած հայրապետների սիրույն ողորմիր մեզ:

Սուրբ Հռիփսիմյան եւ Գայիանյան կույսերի սիրույն, ո՜վ Աստված, ողորմի՛ր ինձ` մեղքերի մեջ կորածիս:

Սուրբ Գրիգորի եւ նրա լուսավոր զավակների սիրույն, որոնց ձեռքով ճանաչեցինք քեզ` մեր Փրկչին, եւ որի ձեռքով Հայաստան աշխարհից հալածեցիր դեւերի բազմությունը, այժմ եւս անմիջապես հեռացրու սատանային մեզանից:

Սուրբ Վարդանանց ու Ատոմյանց զորավարների եւ նրանց ընկերացող սուրբ քահանաների սիրույն, որոնք չարի դեմ պատերազմեցին եւ նրա պատերազմը խափանելով` Հայաստան աշխարհի սուրբ եկեղեցիները կործանումից փրկեցին, հիմա՛ եւս, Տե՜ր, խափանիր սատանային` իր չար գործակիցներով միասին:

Սուրբ ճգնավորների, վանական հայրերի եւ նրանց աշակերտած այրերի ու կանանց բարեխոսությամբ ողորմի՛ր ինձ, Տե՜ր, որովհետեւ նրանք քեզանից շնորհք ստացան եւ քո անունո՛վ հաղթեցին բանսարկուի բոլոր հնարքներին: Հիմա՛ եւս, Տե՜ր իմ, քո հաղթող զորությամբ հաղթահարի՛ր հակառակամարտը եւ մեզ հաղթանակ տուր նրա ընդդիմության դեմ:

Մեր բոլոր սուրբ հայրապետների եւ առաջնորդների բարեխոսությամբ, որոնց իշխանություն տվեցիր ոտքի տակ առնելու օձերին ու կարիճներին, եւ թշնամու ամբողջ զորությունը, շնորհի՛ր, որ հիմա մենք եւս նրանց բարեխոսությամբ ոտքի տակ առնենք կամակոր վիշապի գլուխը եւ լռեցնենք ու կապենք ամեն տեսակ հերձվածողների բերանները:

Կանանց ծնունդների մեջ մեծագույնի` Սուրբ Հովհաննեսի, եւ նախավկա Սուրբ Ստեփաննոսի բարեխոսությամբ մաքրի՛ր մեզ հոգեկան ու մարմնական ամեն պղծությունից եւ արժանի արա, որ ճշմարտապես, հոգով ու ճշմարտությամբ քեզ երկրպագողների հետ միասին երկրպագենք քեզ եւ փառավորենք ամենասուրբ Երրորդությունը, այժմ եւ միշտ եւ հավիտյանս հավիտենից:

Ամեն:

Մեսրոպ Վարդապետ

Շարունակել կարդալ

Աղոթք խնդրանքների կատարման համար

Քո դիմաց ծունկի եկած` ամբողջ սրտով աղաչում ենք եւ գթությունդ հայցում, բարերար եւ բազումողորմ Աստված: Ինչպես քո ծառաներին խոստացար` ասելով. ՙԻնչ որ հավատքով խնդրեք Հորից` Որդու անունով, կը տրվի ձեզ՚, այս պահին շնորհի՛ր եւ իրենց բարի կատարման հասցրու քեզ հավատացողներիս խնդրանքները, որովհետեւ քե՛զ ենք ապավինել: Քո առատ ողորմությամբ մխիթարի՛ր մեզ այս կյանքում եւ առաջնորդելով` երկնքի անպատմելի արքայությանդ հասցրու, որպեսզի ամենասուրբ Երրորդությունդ փառաբանվի եւ պատվվի. այժմ եւ միշտ եւ հավիտյանս հավիտենից:

Ամեն:

Շարունակել կարդալ

Աղոթք ՍԲ Հաղորդություն ստանալուց հետո

Դու, որ մեր տկար բնության փորձառությունը ունեցար, ո՜վ մեր քահանայապետը` Հիսուս, քեզ ենք նայում: Դու` որ մեզ համար մեղքի պատարագ եղար, որպեսզի մենք քեզ համար արդար լինենք: Դու` որ մեզ համար երկրավոր եղար, որպեսզի մենք քեզ համար երկնավոր լինենք: Դու` որ մեզ համար հաց եղար, որպեսզի մենք քեզ ճաշակելով սրբվենք: Տո՛ւր վշտերով լեցուն քո մարմինը, որպեսզի բոլոր սրտերը քեզ ճաշակեն եւ սրբվեն: Մատռվակի՛ր վտակի պես կաթկթող քո անմեղ արյունը, որպեսզի մարդիկ անմեղությամբ հագենան: Երկարի՛ր փրկարար խաչդ` այս աշխարհի ծովում լողացողներիս, մեզ վեր` դեպի քեզ բարձրացնելու համար:

Շնորհքի՛ կարոտ ենք, սփռի՜ր, հոգնած ենք մեղանչելուց, քավի՛ր, խավարի մեջ ենք խարխափում, ճառագայթի՛ր. մեր հավատքից տապալվել ենք, հաստատի՛ր: Դո՛ւ ես հույսը, դո՛ւ ես լույսը, դո՛ւ ես կյանքը, դո՛ւ ես քավությունը, դու ինքդ ես անմահությունը: Քե՛զ ենք սպասում, քո շնորհի կռթնածներս, քեզնից փրկություն ստանալու կարոտ ենք, քո մարմնին միացածներս. քե՛զ որպես քավիչ քահանա ունենք. մենք` քո արյունով գնված հոտդ: Նայի՛ր բոլորիս, սփոփիր մեր տարակուսանքները քո փրկագործությամբ, հանդարտեցրո՛ւ մեր խռովությունները քո խաղաղությամբ, հանգստացրո՛ւ մեր հոգնած հոգիները քո օթեւանների մեջ, ուր դու գնացիր, ո՜վ Տեր, եւ նույնը մեզ խոստացար:

Եւ արժանացրո՛ւ մեզ` քեզ պատկանողներիս, որ փառավորենք քեզ, Հոր եւ Սուրբ Հոգու հետ միասին` հավիտյանս:

Ամեն:

Ս. Ներսես Լամբրոնացի

Շարունակել կարդալ

ՀԱԵԳԹԵԿ հոգևոր ճամբար Հուլիսի 26-28-ը

Հայ Առաքելական Եկեղեցու

Գուգարաց թեմի երիտասարդական կազմակերպության (ՀԱԵԳԹԵԿ)

հոգևոր ճամբարը հուլիսի 26-28-ը

 «Ծիծեռնակ» ճամբարում

ՕՐԱԿԱՐԳ

ՀՈՒԼԻՍԻ 26

10:00-11:00 – Ժամանում, ծանոթացում տարածքին

11:30 – Ծանոթացում միմյանց հետ

12:00 – Թեմական երիտասարդական ճամբարի բացումը ՍՐԲՈՑ ՄԱՆԿԱՆՑ մատրան առջև.

 Գուգարաց թեմի առաջնորդ բարձրաշնորհ Տեր Սեպուհ արքեպիսկոպոս Չուլջյանի օրհնության խոսքը, ակնկալիքներն ու սպասումները:

13:00 – Ճաշ

14:00 – Հանդիպում Վարդաբլուրի և տարածաշրջանի հոգևոր հովիվ Տեր Մերուժան քահանա Սողոյանի հետ: Զրույց «Ճշմարիտ քրիստոնյան» թեմայով:

15:00 – Հոգևոր դաս Վանաձորի «Նարեկացի» երիտ. միության հոգևոր պատասխանատու Տեր Ստեփանոս քահանա Մարգարյանի հետ «Սբ Պատարագ և ժամերգություն» թեմայով

16:00 – Հանդիպում Վանաձորի Սբ Գրիգոր Նարեկացի եկեղեցու հոգևոր հովիվ Տեր Վահան քահանա Ազարյանի հետ «Առաջնորդ լինելու մասին» թեմայով

17:30 – Հանգիստ

18:00 – Ավետարանի ընթերցում (Մատթեոս 19.3-12, Ա Կորնթացիներ 6.18-7.11), զրույցի ծավալում ընթերցվածքի շուրջ Տեր Կարապետ վարդապետ Հարությունյանի հետ:

19:30 – Ընթրիք

20:00 – Հոգևոր դաս Տեր Կարապետ վարդապետ Հարությունյանի հետ «Հոգևոր մշակույթը և նրա հաջորդական ընթացքը» թեմայով

21:00 – Կարծիքների փոխանակում Հայաստանում տիրող բարոյահոգեբանական վիճակի մասին(«Քրիստոնեական առաքինություններ և քրիստոնեական կենցաղավարություն»): Խնդիրների հավաքագրում, հարցերի առաջքաշում:

22:00 – Ընկերային հավաք. ներթեմական մշակութային միջոցառում

23:00 – Հոգևոր ֆիլմի դիտում Павел Лунгин «ОСТРОВ»

00:00 – Քուն

ՀՈՒԼԻՍԻ 27

08:00 - Վեր կաց 

08:10 – Սանիտարական ժամ

08:30-09:00 – Միասնական աղոթք, մարզանք կամ զբոսանք

09:30 – Նախաճաշ

10:00 – Ավետարանի ընթերցում(Եբրայեցիներ13.7-9,Հովհաննես 16.33-17.8), զրույցի ծավալում ընթերցվածքի շուրջ Տեր Կարապետ վարդապետ Հարությունյանի հետ:

11:00 - Հանդիպում Գուգարաց թեմի առաջնորդ բարձրաշնորհ Տեր Սեպուհ արքեպիսկոպոս Չուլջյանի հետ

13:00 – Ճաշ

14:00 – Տարածաշրջանների երիտասարդաց միությունների իրավիճակային պատկերի ներկայացում. միություններում առկա հիմնական խնդիրների վերհանում. քննարկում:

 15:00 – Խմբերի բաժանում` առաջադրված հարցերի ու խնդիրների լուծման և այդ լուծման գործում միության դերի ու գործունեության մեթոդների և մեխանիզմների մշակման համար:

16:00 - Հոգևոր դաս Տեր Կարապետ վարդապետ Հարությունյանի հետ «Մեկ ազգ, մեկ հայրենիք, մեկ եկեղեցի» թեմայով. (եկեղեցի-պետություն հարաբերությունները):

16:30 - Հանդիպում «Թռիչք» հկ-ի նախագահ Հովհաննես Նիկողոսյանի հետ «Երիտասարդ առաջնորդների կազմակերպչական կարողությունների խթանում» թեմայով:

17:30 – Հանգիստ

18:00 – Հանդիպում Վանաձորի Սբ Գրիգոր Նարեկացի եկեղեցու հոգևոր հովիվ Տեր Վահան քահանա Ազարյանի հետ «Երիտասարդ առաջնորդների կազմակերպչական կարողությունների խթանում» թեմայով- շարունակություն

19:30 – Ընթրիք

20:00 – Խմբերի առանձին աշխատանքների կազմակերպում

20:30 – Հոգևոր դաս Տեր Կարապետ վարդապետ Հարությունյանի հետ «Առաջնորդի անհրաժեշտությունը. հոգևոր արթնություն և դրա անհրաժեշտ կիրառումը» թեմայով

21:00 – Քննարկումներ. օրվա գնահատականը.

21:30 - Ինտելեկտուալ խաղ-մրցույթ «Ինչ, որտեղ, երբ»

22:30 – Խոկում, միասնական աղոթք:

23:00 – Հոգևոր ֆիլմի դիտում «ФОРПОСТ»

00:00 – Քուն

 

ՀՈՒԼԻՍԻ 28

08:00 – Վեր կաց

08:10 – Սանիտարական ժամ

08:30-09:00 – Միասնական աղոթք, մարզանք կամ զբոսանք

09:30 – Նախաճաշ

10:00 – Ուխտագնացությունը դեպի Վանաձորի աաջնորդանիստ Սբ Գրիգոր Նարեկացի եկեղեցի

11:00-13:00 – Մասնակցություն Սբ Պատարագին Վանաձորի Սբ Գրիգոր Նարեկացի եկեղեցում

14:00 – Ճաշ

14:45 – Խմբերի կողմից արված առաջարկությունների քննարկում, ամփոփում:

16:30 – Առաջիկա երկու ամիսների ՀԱԵԳԹԵԿ ծրագրերի մշակում(Համաթեմական, ներթեմական(քույր միությունների միասնական ծրագրեր))

17:30 – Հանգիստ

18:00 - ՀԱԵԳԹԵԿ աշխատանքային մոդելի հստակեցում, կենտրոնական խորհրդի վերակազմավորում: Թեմակալ առաջնորդի կողմից տարածաշրջանների երիտ միություններին տրվելիք հանձնարարականները:

19:30 – Ընթրիք

20:00 – Հոգևոր դաս Վանաձորի «Նարեկացի» երիտ. միության հոգևոր պատասխանատու Տեր Ստեփանոս քահանա Մարգարյանի հետ «Երիտասարդների դերը Հայ Առաքելական եկեղեցում» թեմայով

22:00 – Ճամբարի պաշտոնական փակում (Կարծիքների կիսում, մշակութային համարներ, «Գաղտնի ընկեր» խաղի ամփոփում...)

22:30 – Ազատ ժամ

00:00 - Քուն

ՀՈՒԼԻՍԻ 29

08:00 – Վեր կաց

08:10 – Սանիտարական ժամ

08:30-09:00 – Միասնական աղոթք, մարզանք կամ զբոսանք

09:30 – Նախաճաշ

10:00 – Մեկնում ճամբարից

Հոգևոր ճամբարի նպատակն է.

Երիտասարդներին հոգևոր գիտելիքներով զինելուց զատ` վերապատրաստել որպես առաջնորդներ, նրանց մեջ ձևավորել պատասխանատվության գիտակցություն և խթանել կազմակերպչական կարողությունները` այսպիսով նպաստելով թեմի հովիվների երիտասարդաց միությունների գործունեությանը:

Նյութի աղբյուր՝  http://gugaratstem.blogspot.com/p/blog-page_1700.html

Շարունակել կարդալ