Վիրավորական է, երբ դրսից եկած կեղծ «հովիվները» մեզ ոչխարի տեղ են դնում

«Հայաստանում նոր կրոնական աղանդ է ձևավորվում, որը պրոպագանդում է միասեռականություն, մանկապղծություն, հարազատների միջև սեռական հարաբերություն և այլ անբարո արարքներ»,-այսօր,«Նոյյան Տապան» մամուլի սրահում այսպիսի հայտարարություն արեցին Կոմիտաս վարդապետ ՀՈՎՆԱՆՅԱՆԸ և Միացյալ երիտասարդական լիգայի համանախագահ Սևակ ՀՈՎՀԱՆՆԻՍՅԱՆԸ:

Հայաստանում, ըստ բանախոսների, տարաբնույթ աղանդները սկսել են ներխուժել անկախությունից հետո: Նրանց նպատակը մեկն է` ժողովրդին պառակտելը: Ներկայումս շուրջ 215 աղանդ կա մեր երկրում:

Կոմիտաս վարդապետի խոսքով այս վերջինը` «Քրիստոնեական միջազգային ընտանիք» աղանդը, ամենասարսափելին և ամենավտանգավորն է, քանի որ ինքնասպանության կոչ է անում նաև: Աղանդը, որը փորձում է տեղ գտնել Հայաստանում, գործում է քրիստոնեության անվան տակ, ունի նաև «Աստծո երեխաներ», «Ընտանիք» անվանումները: Ըստ Ս.Հովհաննիսյանի, այն մեզ մոտ է եկել ՈՒկրաինայից, գրանցված չէ, ունի ընդամենը տասը անդամ, որոնց հիմնական հավաքատեղին Արտաշատն է ու Երևանը: «ՈՒնեն նաև կայքեր, որտեղ պոռնոգրաֆիա են տարածում, սակայն ասում են` քրիստոնեական եկեղեցի են»,-զարմանքով նկատեց նա:

Թե ի՞նչ են մտածում խնդրի վերաբերյալ պետական մարմինները, պարոն Հովհաննիսյանն ասաց, որ վերջիններս ոչինչ էլ չեն անում. «Սա պետք է մտահոգի յուրաքանչյուրիս: Եթե հայ ենք, պետք է քայլեր ձեռնարկենք այս անբարո երևույթը կանխելու համար: Ամեն անգամ դրսից գալիս են այդ կեղծ հովիվները և փորձում են մեզ ոչխարների տեղ դնել»:

Վարդապետի կարծիքով, բոլոր աղանդները քաղաքական նպատակներ ունեն` ազգադավություն: «Աղանդի գլխավոր տարածողը Դեյվիդ Բերգն է, որի մասին կարիք չկա փաստեր գտնել, քանի որ բոլորին հայտնի է, թե ինչ գաղափարախոսություն տարածող է այդ անձը»,-ասաց հոգևորականը` հավելելով, որ մեզ հարկավոր է ազգային շահը պաշտպանող պետական ծրագիր, ինչպես այլ երկրներում:

Հասմիկ ՄՈՎՍԻՍՅԱՆ

Աղբյուր` http://www.irates.am/hy/1378730209?fb_action_ids=10202105558904966%2C10202105065212624%2C10202105003851090%2C10202104951969793%2C10202104896848415&fb_action_types=og.likes&fb_ref=.Ui30AgtCk4I.like&fb_source=other_multiline&action_object_map=%7B%2210202105558904966%22%3A209084152593583%2C%2210202105065212624%22%3A509358385805478%2C%2210202105003851090%22%3A422963711157325%2C%2210202104951969793%22%3A597121186992720%2C%2210202104896848415%22%3A569657356429594%2C%2210202104890568258%22%3A1389676217928876%2C%2210202104889528232%22%3A568628663195206%2C%2210202104882808064%22%3A439238142858355%7D